Ish-prokurori Ervin Karanxha ka komentuar grabitjen e ndodhur këtë të shtunë në një argjendari në Kamëz, duke deklaruar se autorët e ngjarjes kanë vepruar si profesionistë dhe se objekti dyshohet të jetë mbajtur nën vëzhgim prej kohësh.I ftuar në emisionin “Terminal” të gazetares Aurora Sulçe në A2CNN, Karanxha u shpreh se mënyra e organizimit dhe qetësia me të cilën kanë vepruar autorët tregojnë eksperiencë kriminale dhe planifikim të detajuar.
“Sipas veprimeve të para që shihen në pamjet filmike, ata janë shumë të saktë në veprimet që kryejnë. Nuk kanë qëlluar me armë, thjesht kanë marrë gjërat që donin. Duket që kanë kohë që e ruajnë objektivin dhe kanë gjetur momentin më të përshtatshëm”, deklaroi ish-prokurori.Karanxha ngriti edhe dyshime për mungesë vëmendjeje nga ana e policisë në terren në momentin kur është kryer grabitja.
“Ndoshta, pse jo, edhe në momentin që policia vendos gjobat, kur janë të angazhuar në dokumentimin e shkeljes administrative duke i bërë foto parkimit dysh, ndërkohë që nga ana tjetër këta kanë realizuar ngjarjen kriminale”, tha ai.Sipas ish-prokurorit, grabitja konsiderohet një goditje e rëndë edhe për shkak të rritjes së fortë të çmimit të floririt në treg gjatë viteve të fundit.“Kohët e fundit jemi në dijeni që është rritur edhe çmimi i floririt në treg. Është gati trefishuar krahasuar me 3-4 vite më parë. Kjo është një goditje e madhe”, u shpreh Karanxha.Policia po vijon hetimet për identifikimin dhe kapjen e autorëve, ndërsa deri tani nuk janë bërë publike detaje mbi vlerën e sendeve të grabitura.