Humb jetën në aksident në Greqi 55-vjeçari shqiptar, u përplas nga kamioni teksa lëvizte me biçikletë
Një ngjarje tragjike ka ndodhur në Greqi, ku një shtetas shqiptar ka humbur jetën si pasojë e një aksidenti rrugor në zonën “Pirgos Ilias”, në Peloponez.
Sipas informacioneve nga policia greke, viktima është 55-vjeçari Fatmir Dyrmishi, i cili po lëvizte me biçikletë në një kryqëzim pranë hyrjes së qytetit, kur në rrethana që ende nuk janë sqaruar plotësisht, është përplasur nga një kamion.
Për shkak të plagëve të rënda të marra nga përplasja, shqiptari është transportuar me urgjencë në spital, por pavarësisht përpjekjeve të mjekëve, nuk ka mundur të mbijetojë.
Trupi i pajetë është dërguar në morgun e spitalit për procedurat përkatëse, ndërsa autoritetet greke kanë nisur hetimet për të zbardhur shkaqet dhe rrethanat e plota të aksidentit.
Ndërkohë, drejtuesi i kamionit është shoqëruar nga policia për veprime të mëtejshme hetimore.
Mësohet se 55-vjeçari jetonte i vetëm në zonën e Pirgos, ndërsa familja e tij ndodhet në Shqipëri.
Shënim: Çdo person që mund të përmendet në përmbajtjen e këtij artikulli, mbështetur mbi parimin procedural penal dhe atë universal të prezumimit të pafajësisë, konsiderohet i pafajshëm penalisht, nëse nuk ka ose deri kur të ketë një vendim të formës së prerë. noa