Presidenti i Ukrainës, Volodymyr Zelenskyy, deklaroi se Rusia po përpiqet të përfshijë më thellë Bjellorusinë në luftë dhe po shqyrton mundësinë e një sulmi ndaj një vendi të NATO-s nga territori bjellorus.Sipas Zelenskyt, Kievi ka informacione për kontakte të reja mes Moskës dhe presidentit të Bjellorusisë, Alexander Lukashenko, me qëllim bindjen e tij për t’u përfshirë në operacione të reja ushtarake ruse.Në një postim në Telegram, pas një takimi me drejtues ushtarakë dhe shërbimet sekrete ukrainase, Zelensky tha se Rusia po shqyrton plane operative në veri dhe jug të Bjellorusisë.
Sipas tij, sulmet mund të drejtohen ose ndaj veriut të Ukrainës, në zonën Çernihiv-Kiev, ose direkt ndaj një shteti anëtar të NATO-s.Presidenti ukrainas nuk dha detaje të tjera mbi informacionet e inteligjencës.Bjellorusia kufizohet me Ukrainën në jug dhe me vende anëtare të NATO-s si Polonia, Lituania dhe Letonia në veri dhe perëndim.Deri tani nuk ka pasur reagim zyrtar nga Rusia apo Bjellorusia lidhur me deklaratat e Zelenskyt.
Bjellorusia ishte përdorur nga Rusia si pikë nisjeje gjatë pushtimit të Ukrainës në shkurt të vitit 2022, megjithëse Minsku nuk dërgoi trupa në front.Ndërkohë, Bjellorusia ka pranuar vendosjen e armëve taktike bërthamore ruse dhe raketave hipersonike “Oreshnik” në territorin e saj.Zelensky tha se Ukraina po përgatit plane reagimi dhe po forcon mbrojtjen në rajonet veriore të Çernihivit dhe Kievit.