Tre persona humbën jetën dhe disa të tjerë mbetën të plagosur pasi një makinë përplasi këmbësoret në Oakland të Kalifornisë.
Sipas autoriteteve lokale, ngjarja ndodhi rreth orës 23:15 në kryqëzimin e International Boulevard me 85th Avenue.
Shërbimi zjarrfikës i Oakland konfirmoi se tre persona u shpallën të vdekur në vendngjarje, ndërsa tre të tjerë u transportuan në spital, dy prej tyre në gjendje kritike.
Mediat amerikane raportojnë se drejtuesi i automjetit, një i mitur, dyshohet se po lëvizte me shpejtësi të lartë dhe në mënyrë të pakontrolluar kur goditi fillimisht një automjet të parkuar dhe më pas doli mbi trotuar, duke përplasur një grup këmbësorësh.
Pas aksidentit, i mituri tentoi të largohej nga vendngjarja, por u ndalua nga dëshmitarët e pranishëm deri në mbërritjen e policisë.
Autoritetet thanë se si drejtuesi i mjetit, ashtu edhe një person tjetër, pësuan plagë të lehta dhe u dërguan për trajtim mjekësor.