Pushimet verore janë në rrezik. Kompania ajrore gjermane Lufthansa do të shkurtojë 20 mijë fluturime me distanca të shkurtra gjatë verës, duke thënë se çmimet e larta të karburantit i kanë bërë shumë udhëtime “të pafitueshme” për firmën.
Çmimi i karburantit për avionë është dyfishuar që nga fillimi i luftës SHBA-Izrael me Iranin, pasi konflikti ka ngadalësuar prodhimin dhe transportin e tij në të gjithë Lindjen e Mesme.
Disa linja ajrore, përfshirë KLM-France dhe Delta, gjithashtu kanë ulur përkohësisht disa fluturime, ndërsa të tjera kanë rritur çmimet e biletave pasi ia kalojnë shpenzimet klientëve. Analistët kanë paralajmëruar se udhëtarët duhet të presin rritje të mëtejshme të çmimeve të biletave dhe më shumë fluturime të anuluara, ndërsa konflikti vazhdon.
Gjiri Persik është një burim i madh i karburantit të aviacionit, që përbën rreth 50% të importeve të Europës. Pjesa më e madhe e tij vjen përmes Ngushticës së Hormuzit. Agjencia Ndërkombëtare e Energjisë paralajmëroi javën e kaluar se Europa mund të mbetet pa karburant për avionë brenda disa javësh.