Bashkimi Europian ka miratuar një tjetër paketë mbështetjeje financiare për Shqipërinë në kuadër të Planit të Rritjes për Ballkanin Perëndimor.
Sipas njoftimit të konfirmuar nga Rama, vendi ynë përfiton 49 milionë euro shtesë, duke e çuar totalin e mbështetjes në rreth 212 milionë euro, një nga shifrat më të larta të përfituara nga vendet e rajonit.
Kryeministri Edi Rama e ka cilësuar këtë mbështetje si pjesë të rrugës së Shqipërisë drejt Bashkimit Europian dhe një tregues të progresit të bërë në reformat kryesore.
“Tjetër mbështetje financiare e Bashkimit Europian ka ardhur nga Brukseli, ndërsa është vendosur çelja e fazës përmbyllëse të negociatave. Njëkohësisht, është vijuar edhe me çeljen e një tjetër fondi për Shqipërinë në kuadër të Planit të Rritjes për Ballkanin Perëndimor.
49 milionë euro, të cilat e çojnë mbështetjen deri këtu në 212 milionë euro, ose shifra më e lartë e përfituar nga vendet e rajonit prej Planit të Rritjes. Plani i Rritjes është një plan financimi mbi bazë rezultatesh, dhe janë rezultate të certifikuara nga Komisioni Europian, të padiskutueshme në objektivitetin e tyre.
Shqipëria jonë, Shqipëria europiane që po ndërtojmë, është një histori suksesi, një histori që nuk shkruhet me britma, nuk bëhet me shpifje apo me molotovë, por me vizion, me punë, me durim të madh dhe me përkushtim, hap pas hapi, reformë pas reforme.
E pra, urime të gjithëve dhe, mbi të gjitha, faleminderit! Faleminderit çdo shqiptari dhe shqiptareje që beson, që mbështet dhe që ecën me ne në këtë mision historik”,tha Rama.