Një burrë 37-vjeçar, i cili kishte qenë i martuar për 12 vjet, ka mbetur pa familje pasi kërkoi një test ADN-je për fëmijën e tij të mesëm, i bindur se djali nuk ishte i tij pasi nuk i ngjante.
Siç ka treguar vetë në platformën Reddit, për vite me radhë e kishte munduar dyshimi, pasi fëmija më i madh dhe më i vogli kishin tipare të ngjashme me të, ndërsa djali i mesëm dukej ndryshe.
Ai vendosi të bëjë testin e atësisë, i bindur se kështu do të zbulonte më në fund të vërtetën. Edhe pse bashkëshortja reagoi ashpër ndaj kërkesës, testi megjithatë u krye.
Rezultatet treguan se ai ishte vërtet babai biologjik i fëmijës. Por në vend të lehtësimit, pasoi një goditje tjetër – bashkëshortja i tha se dëshironte divorc.
Sipas rrëfimit të tij, ajo i tha se nuk mund t’i besonte më, pasi ai e kishte akuzuar për tradhti dhe kishte lënduar djalin e tyre, i cili kishte filluar të pyesë veten nëse babai e urrente.
Burri pranoi se nuk ishte i vetëdijshëm se sillej ndryshe ndaj fëmijës së mesëm, por bashkëshortja i tha se kjo ishte e dukshme për të gjithë rreth tyre.
Postimi i tij ka shkaktuar shumë reagime në Reddit, ku shumica e përdoruesve janë rreshtuar në anën e bashkëshortes. Ata vlerësuan se problemi nuk qëndronte te testi i ADN-së, por te mungesa e besimit dhe mënyra se si ai ishte sjellë ndaj fëmijës së tij.