Është shënuar viktima e parë për shkak të stuhisë Erminio që goditi Greqinë, ku një burrë mësohet se është gjetur pa shenja jete në një maknë, pasi vendi është përfshirë nga moti i keq me shira të rrëmbyeshëm, stuhi dhe erëra të forta.
Mediat vendase raportojnë se zjarrfikësit kanë nxjerrë nga poshtë një makine një shtetas polak në zonën e Nea Makri-t.
Burri polak mësohet se u rrëmbye nga një përrua dhe ngeci i bllokuar nën një makinë në rrugën Megalou Alexandrou.
Paraprakisht thuhet se polaku afro 54-vjeç doli nga shtëpia e tij, e cila thuhet se ishte përmbytur, pak pas mesnatës. Në rrethana deri tani të panjohura, dyshohet se ai rrëshqiti dhe u bllokua menjëherë nën një makinë, çka solli dhe vdekjen tragjike të tij.
Ndërsa mësohet se shumë shkolla në Greqi vijojnë të jenë të mbyllura për shkak të fenomeneve të forta dhe pluhurit afrikan.
Sipas Departamentit të Zjarrfikësve, problemet më të mëdha për shkak të motit janë regjistruar në Atikën lindore dhe jugore, Kretë dhe Peloponez. Deri në orët e para të mëngjesit të së enjtes, ata kishin marrë mbi 170 thirrje për prerje pemësh, heqje objektesh, pompim uji dhe ndihmë.
Ndërsa raportohet se dhe gjatë ditës së sotme të gjitha shkollat në Dodekanezë, Ciklade dhe Kretë do të mbeten të mbyllura sot, më 2 prill, për shkak të motit të keq Erminio dhe pluhurit afrikan.
“Funksionimi i të gjitha njësive shkollore të të gjitha niveleve arsimore, në të gjithë territorin e Cikladeve dhe Dodekanezës, pezullohet të enjten, më 2 prill 2026, për mbrojtjen parandaluese të sigurisë publike. Pezullimi vlen edhe për njësitë e Arsimit Parashkollor dhe të gjitha Shkollat Speciale”, njoftoi guvernatori rajonal i Egjeut Jugor, Giorgos Hadjimarkos.