Seanca në Gjykatën e Posaçme ku pritej të dëshmonte Mustafa Martinaj për çështjen e pronave të të birit dhe personave të lidhur me të u shty për shkak të mungesës së dy prokurorëve të çështjes.
Pas përfundimit të seancës, Martinaj u shpreh për mediat duke konfirmuar se djali i tij, Ervis Martinaj, “është ekzekutuar në Durrës”, duke shtuar se për këtë çështje ai kishte dhënë shpjegime edhe para Byrosë Kombëtare të Hetimit, ku ishte paraqitur me iniciativën e tij dy muaj pas ngjarjes. Ai kritikoi hetimet, duke deklaruar se autoritetet “nuk duan ta hetojnë dhe ia kanë lënë Kurbinit”.
I pyetur nëse ndihet i interesuar mbi punën e Prokurorisë së qytetit, ai tha se nuk kishte fuqi për hakmarrje dhe se ishte paraqitur vetëm për shkak të thirrjes së gjykatës, duke përmendur edhe gjendjen e tij shëndetësore dhe disa ndërhyrje mjekësore.
Seanca e radhës u shty për dy javë, ndërkohë që vazhdon gjykimi mbi kërkesën e SPAK për konfiskimin e disa pasurive. Të pranishëm në gjykatë ishin edhe dy dëshmitarë të tjerë të thirrur nga SPAK. Ervis Martinaj kishte rezultuar i zhdukur që prej 9 gushtit 2022, dhe autoritetet nuk kanë dhënë kurrë konfirmim zyrtar për fatin e tij.