Ndërtesa janë dëmtuar dhe disa makina janë përfshirë nga flakët në Tel Aviv të Izraelit, pas një sulmi me raketa nga Irani të martën në mëngjes.
Ka pasur të paktën katër vende të cilat janë goditur në Tel Aviv, me gjashtë persona të raportuar të plagosur deri tani, sipas shërbimit të emergjencës së Izraelit, Magen David Adom.
Ekipet e kërkim-shpëtimit ndodhen në terren në disa nga vendet e goditjes, tha policia.
Video nga një prej skenave, tregon tym të zi që ngrihet ndërsa një zjarr është i ndezur pranë një ndërtese që duket e dëmtuar rëndë. Fasada e disa kateve të ndërtesës është shembur, ndërsa mbeturinat janë shpërndarë në tokë.
Ushtria izraelite kishte paralajmëruar më herët të martën për lëshime raketash nga Irani, ndërsa policia tha se ekspertët e çmontimit të bombave janë dërguar për t’u marrë me eksplozivët e rënë.
Forcat e Mbrojtjes së Izraelit gjithashtu thanë se po reagonin në “disa zona në Izraelin qendror” ku janë raportuar goditje.