Një ngjarje e rëndë ka ndodhur këtë të mërkurë në Volos, ku një zjarr i fuqishëm shpërtheu në një banesë.
Si pasojë e flakëve, humbën jetën nënë e bijë në zonën e “Agia Paraskevi”. Ndërkohë, në gjendje të rëndë ndodhet djali i vajzës, i cili ka pësuar djegie të shumta dhe është dërguar në spital.
Sipas mediave greke, i riu është intubuar për shkak të gjendjes së rëndë, ndërsa mjekët po shqyrtojnë mundësinë e transferimit të tij në një njësi të specializuar për trajtimin e djegieve, sapo gjendja e tij të stabilizohet.
Në vendngjarje ndodhen 16 zjarrfikës dhe 6 automjete, të cilët po punojnë për shuarjen e flakëve.
Ende nuk dihen rrethanat e sakta që çuan në shpërthimin e zjarrit. Megjithatë, zjarrfikësit kanë gjetur brenda banesës një ngrohës halogjeni të dëmtuar dhe dyshohet se ai mund të ketë qenë shkaku i zjarrit.