Umberto Bossi, themeluesi i Lega Nord dhe një nga figurat më të njohura dhe polemike të politikës italiane, ka ndërruar jetë në moshën 84-vjeçare.
Sipas mediave italiane, ai u shtrua një ditë më parë në spitalin e Varese-s në gjendje kritike dhe ndërroi jetë në orën 20:30.
I lindur më 19 shtator 1941 në Cassano Magnago, Bossi nisi aktivitetin politik në vitet ’70 në rryma të majta, por më pas u orientua drejt ideve autonomiste dhe federaliste. Në vitet ’80 themeloi Lega Lombarda, që më vonë u shndërrua në Lega Nord, një projekt politik që bashkoi disa lëvizje rajonale të veriut të Italisë.
I zgjedhur për herë të parë senator në vitin 1987, ai fitoi nofkën “Senatùr” dhe u bë shpejt një figurë qendrore në skenën politike. Në vitin 2001 hyri në qeverinë e Silvio Berlusconit si ministër për reformat institucionale dhe federalizmin, një rol që e mbajti edhe në vitin 2008.
Bossi udhëhoqi Lega Nord për rreth dy dekada, duke promovuar federalizmin dhe, në disa faza, edhe idenë e pavarësisë së “Padanisë”. Partia e tij u identifikua me slogane të forta politike dhe një retorikë të drejtpërdrejtë kundër centralizimit në Romë.
Karriera e tij u ndikua ndjeshëm nga një goditje në tru në vitin 2004, që e detyroi të tërhiqej përkohësisht nga aktiviteti politik. Në vitin 2012 dha dorëheqjen si sekretar i Lega Nord pas një skandali për përdorimin e fondeve të partisë, çështje që çoi edhe në procese gjyqësore.
Në vitet pasuese, ndikimi i tij u zbeh, sidomos pas ardhjes në krye të partisë të Matteo Salvinit, i cili e transformoi Lega-n në një forcë politike me shtrirje kombëtare.
Gjatë jetës së tij politike, Bossi u përball me disa hetime dhe procese gjyqësore, përfshirë çështjen e rimbursimeve elektorale, ku u dënua për përvetësim fondesh publike, ndërsa më vonë disa akuza u parashkruan.
Vdekja e tij ka sjellë reagime nga e gjithë spektri politik italian. Ish-udhëheqësi Pier Ferdinando Casini e cilësoi “një luftëtar të palodhur që shënoi historinë politike të Italisë”, ndërsa ministri i Jashtëm Antonio Tajani e përshkroi si “një protagonist të madh të ndryshimeve në vend”.
Edhe figura të tjera politike, përfshirë Pierluigi Bersani dhe Luca Zaia, vlerësuan rolin e tij në formësimin e debatit politik dhe në ngritjen e çështjes së autonomisë rajonale në Itali.
Umberto Bossi mbetet një figurë që ndikoi thellë në transformimin e politikës italiane, duke lënë pas një trashëgimi që vazhdon të ndikojë debatin mbi federalizmin dhe organizimin e shtetit.