Konflikti në Lindjen e Mesme ka hyrë në ditën e 17-të, ndërsa edhe kjo e martë ka nisur me një seri sulmesh dhe zhvillimesh të reja nga të gjitha palët e përfshira në luftë.
Sipas raportimeve ndërkombëtare, Irani ka shënjestruar sërish Ambasadën e Shtetet e Bashkuara të Amerikës në Bagdad, por sistemet e mbrojtjes ajrore amerikane kanë arritur të shkatërrojnë raketat para se të arrinin objektivin.
Sulmet iraniane nuk u ndalën vetëm në Irak. Mediat e huaja raportojnë se edhe Abu Dhabi u vu nën shënjestër gjatë ditës së sotme. Si pasojë e mbetjeve të një rakete balistike të shkatërruar, një shtetas pakistanez humbi jetën. Po ashtu, një sulm me dron goditi edhe fushën e naftës Shah në Emiratet e Bashkuara Arabe, një nga zonat më të rëndësishme të prodhimit të hidrokarbureve në rajon.
Nga ana tjetër, Izraeli njoftoi se gjatë sulmeve ajrore të së hënës në mbrëmje ka vrarë një figurë të rëndësishme të regjimit iranian. Ministri izraelit i Mbrojtjes, Israel Katz, deklaroi se gjatë ofensivës u eliminua sekretari i Këshillit Suprem të Sigurisë Kombëtare të Iranit, Ali Larijani.
Ndërkohë, vendet e Gjirit Persik po monitorojnë me shqetësim përshkallëzimin e situatës dhe, sipas burimeve diplomatike, disa prej tyre po i bëjnë presion Uashingtonit që të neutralizojë plotësisht Iranin për të shmangur sulme të tjera në rajon dhe për të mbrojtur furnizimin global me naftë.
Situata është tensionuar edhe në politikën amerikane. Drejtori i Qendrës Kombëtare Kundër Terrorizmit në SHBA, Joe Kent, ka dhënë dorëheqjen nga posti i tij, duke shprehur kundërshtimin ndaj luftës së vazhdueshme kundër Iranit.
Në të njëjtën kohë, presidenti i Ukraina, Volodymyr Zelensky, reagoi ndaj paralajmërimeve të Teheranit për sulme ndaj vendit të tij, duke deklaruar se Ukraina nuk trembet nga kërcënimet dhe se është mësuar të jetojë me presione të vazhdueshme.
Ndërsa përshkallëzimi vazhdon, presidenti amerikan Donald Trump deklaroi nga Zyra Ovale se sulmi ndaj Iranit ishte i domosdoshëm për të shmangur destabilizimin e gjithë rajonit dhe të botës.
Zhvillimet në terren vijojnë me ritme të shpejta dhe pritet që situata në Lindjen e Mesme të mbetet shumë e tensionuar edhe në orët dhe ditët në vijim.