Një aksident i rëndë rrugor ka ndodhur në Pakistan, ku 17 persona kanë humbur jetën dhe 10 të tjerë janë plagosur.
Aksidenti ndodhi kur një autobus pasagjerësh që udhëtonte nga rajoni Swat për në Peshawar në pjesën veriore të vendit pësoi një defekt mekanik dhe u ndal në anë të rrugës.
Mediat shkruajnë se pasagjerët kishin zbritur dhe po prisnin aty pranë, kur një kamion humbi kontrollin dhe u përplas me turmën dhe një autobus të parkuar.
“Të paktën 17 persona u vranë dhe më shumë se 10 u plagosën”, tha Bilal Ahmad Faizi , një zyrtar i ekipeve të shpëtimit, për AFP, duke shtuar se tre nga të plagosurit ishin në gjendje kritike.
Muhammad Ali, një mjek në një spital lokal ku janë dërguar viktimat, gjithashtu konfirmoi numrin e të vdekurve. Shumë nga pasagjerët po ktheheshin në shtëpi përpara Bajramit, një nga festat më të rëndësishme fetare në kalendarin mysliman.