Gazetarja Klodiana Lala ka deklaruar se krimi i organizuar në Shqipëri jo vetëm që pastron para, por edhe shtrin ndikimin e tij në tenderat publikë dhe institucionet shtetërore.
Duke analizuar punën e deritanishme të bërë nga Prokuroria e Posaccme, ajo u shpreh se SPAK ka kaluar nëpër faza të ndryshme, por ka dhënë goditje të rëndësishme ndaj grupeve kriminale, duke përmendur disa prej operacioneve më të bujshme.
Sipas Lalës, SPAK ka shënuar rezultate konkrete, sidomos në goditjen e grupeve të strukturuara kriminale dhe sekuestrimin e pasurive të tyre në vlera të konsiderueshme.
“Grupi kriminal Pepa është ndoshta ndër goditjet e një prej grupimeve më të rrezikshme kriminale dhe sekuestrimi i pasurive të këtij grupimi kriminal në vlera të konsiderueshme, në dhjetëra milionë euro, mendoj që është një çështje mjaft e rëndësishme sepse ishte një kompani dhe unë e kam trajtuar në emisionin “Në Shënjestër”, e cila kishte fituar dhjetëra tendera publikë. Çfarë do të thotë kjo? Pra, krimi i organizuar që pastron paratë dhe shtrin tentakulat në tenderat publikë, dhe nga ana tjetër ishte një grupim kriminal që planifikonte marrjen peng të drejtorëve të një banke të nivelit të dytë.
Imagjinoni se çfarë grupimi i sofistikuar ku katër vëllezërit — njëri prej të cilëve për fat të keq nuk jeton më, por tre të tjerët ishin përfshirë në krim të organizuar, në trafik të kokainës, në pastrim parash dhe në shtrirjen e tentakulave në tendera, që nga rindërtimi e deri tek tenderat në bashki të ndryshme të vendit. Kështu që në këtë kuptim ishte një çështje e rëndësishme dhe e qenësishme sipas meje.
Po ashtu ke patur goditjen e grupit të Ines Hajrullës në Vlorë. Patjetër që atje duhet të ketë edhe grupi kundërshtar si Llanaj e shumë grupime të tjera në atë qytet, por që për herë të parë SPAK shkoi atje dhe që normalisht hapi kutinë e Pandorës për vrasje mafioze që kanë ndodhur në atë qytet e më pas mund të ketë edhe arrestime… arrestime të tjera”, tha ajo.
Sipas saj, SPAK ka ndërhyrë edhe në raste që lidhen me sekuestrime pasurish ndaj personave të dyshuar si pjesë e rrjeteve kriminale dhe abuzimeve me fondet publike, përfshirë edhe në institucione shtetërore, duke u ndlaur në dosjen AKSHI dhe 40 mln eurot e Mirlinda Karçanajt.