Kryetarja e Bashkisë së Vlorës, Brunilda Mersini, ka folur për vendimin e fundit të miratuar në këshillin bashkiak, i cili përcakton tarifën maksimale prej 700 lekësh (rreth 7 euro) për plazhet.
Sipas saj, rreth 15 mijë metra katrorë vijë bregdetare do të jenë plazh publik falas. Në këto hapësira pritet të vendosen rreth 350 çadra dhe shezlongë, ndërsa do të ketë edhe zona publike pa pagesë ku qytetarët mund të përdorin çadrat dhe shezlongët e tyre personalë.
Mersini theksoi se tarifa prej 700 lekësh do të vlejë si kufi maksimal edhe për plazhet private, të cilat do të menaxhohen përmes bashkëpunimit me bizneset. Ajo bëri krahasimin me vitin e kaluar, kur çmimet arrinin deri në 2 mijë lekë (20 euro), duke nënvizuar se këtë sezon nuk do të lejohet tejkalimi i këtij limiti.
Vendimi ka nxitur diskutime të shumta në Këshillin Bashkiak dhe mes qytetarëve të Vlorës gjatë ditëve të fundit.